partekatu
• OPORRAK BAKEAN
Oporrak Bakean programaren barruan uda Lasarte-Orian igaroko duten haur sahararrei harrera instituzionala
Oporrak Bakean programa solidarioari esker uda herrian pasako duten adingabe sahararrei ongietorri ofiziala egin zitzaien astelehenean udaletxeko pleno aretoan.
Pasa den astelehenean, uztailaren 21ean, Oporrak Bakean programaren barruan uda herrian pasako duten haur sahararrei harrera ofiziala egiteko ekitaldia egin zen Lasarte-Oriako Udaleko Osoko Bilkuren aretoan.
Lasarte-Oriako Udaleko Gizarte Zerbitzuek eta Kooperazioak lagunduta, programak aukera ematen du saharar errefuxiatuen kanpalekuetatik datozen adingabeek aste batzuk errefuxiatuen kanpalekuetan bizitzearen gabezietatik aldenduta gozatzeko, udalerriko familiek hartuta.
Ekitaldian jende ugari bildu zen, besteak beste, elkarte laguntzaileetako ordezkariak, herritarrak, harrera-familiak eta Agustín Valdivia alkatea buru zuen ordezkaritza instituzionala, udalbatzako zenbait kiderekin batera.
Bere mintzaldian, alkatea zuzenean zuzendu zitzaien umeei, gertutasuna azalduz eta Lasarte-Orian berriro izateagatik poza adieraziz.
Alkateak, gainera, programa hau posible egiten duen ahalegin kolektiboa eskertu nahi izan zuen:
"Udaletik oso eskertuta gaude hau gauzatu ahal izango delako. Harro gaude honelako kausa batekin kolaboratzeaz. Urtero kanpamenduetatik atera ahal izatea, guztiontzako pozgarria da."
Amaitu aurretik, opariz betetako motxila bat jaso zuten haurrek, ongietorriaren sinbolo gisa, eta ilusioz ireki zuten bertaratutakoen aurrean.
Adin txikikoak Lasarte-Orian egongo dira abuztuaren amaierara arte, eta denbora horretan aisialdi, kirol eta kultur jardueretan parte hartuko dute, beren harrera familiekin biziko dira eta osasun azterketak izango dituzte.
Keinu honekin, Lasarte-Oriak saharar herriaren kausarekin duen konpromiso solidarioa berresten du, beste behin ere, gehien behar dutenei ateak irekiz.
Argazkia eta informazioa: Lasarte-Oriako Udala
